Bana patay, asawa angol sa pagpamusil

CEBU, Philippines —  Patay ang bana ug naangol ang asawa niini human pamusila sa wala mailhing criminal diha sa Barangay Luca, bukiran nga bahin sa Lungsod sa Balamban niadtong Martes sa gabii.

Ang namatay mao si Pedro Cabalida, hingkod ang panuigo samtang ang naangol si Gloria Cabalida, hingkod usab ang panuigon, parehong residente sa maong lugar.

Ang kapolisan nakadawat og tawag gikan sa Army Detachment sa Barangay Luca kalabot sa maong insidente diha sa duol sa merkado publiko sa nahisgutang lugar.

Si Sergeant Joseph Dugon nagkanayon nga samtang anaa siya sa ilang base camp nakadungog siya ug buto sa armas diha sa may merkado hinungdan nga ilaha kining gisusi ug pag-abot nila sa dapit nakit-an nila si Pedro nga wala nay kinabuhi samtang ang asawa adunay mga samad pinusilan sa iyang lawas ug daling gidala ngadto sa tambalanan.

Ang kapolisan sa lungsod pinangulohan ni Police Lieutenant Colonel Glenn Hipe ang niresponde usab sa maong insidente.

Ang kapolisan nipahigayon og imbestigasyon sa pagpiho sa motibo sa pagpamusil ug pag-ila sa kriminal. (BANAT NEWS)