CEBU, Philippines — Gisugdan na sa Archdiocese of Cebu ang pagbansay-bansay sa gitawag nila og mental health care responders nga ilang ipakatap sa tanang parokya.
Sa pakighinabi sa Banat News ngadto sa Assistant Director sa Commission on Youth - Cebu nga si Fr. Dave Christopher Cantillas gitug-an niini nga himoong pilot area sa ilang pagbansay-bansay mao ang pipila ka parokya sa amihanang bahin sa Sugbo.
Inigkahuman sa Semana Santa, isunod dayon ang pag-umol sa mental health responders sa ubang mga parokya dinhi sa Sugbo.
Suma pa ni Fr. Cantillas nga dako kaayo og matabang ang mental health care responders aron dunay dali nga madangpan ang katawhan nga nagsagobang og suliran ug nagtinguha nga adunay kaistorya.
Matud pa niya nga ka-partner nila sa mga programa ang pipila ka pribadong institusyon o kompanya.
Kabahin usab sa COY, duna pud sila'y komitiba alang sa maong butang ug kini mao ang Youth Frontier nga dunay link ngadto sa kabatan-onan sa parokya.
" Makatabang usab ang pag-apil og mga grupo sa simbahan, kay duna may ubang kabatan-onan nga ganahan nga adto mo-share sa ilang problem ngadto sa ilang friends. Makatabang man pud ang spiritual formation, ingon man usab ang lig-ong relasyon nila sa ilang pamilya," matud pa ni Cantillas.
Nasayran nga dili lalim ang nahiagoman sa pipila ka tawo gumikan sa nagkalain-laing sitwasyon ug usa na niini ang nahatag sa pandemya. Dugang pa ni Cantillas nga dili usab angayan kalimtan ang kanunay nga pag-ampo.
Suma pa niya nga hingusgan gyud sa Archdiocese of Cebu ang pag-reach out sa kabatan-onan alang sa nagkadaiyang programa. (BANAT NEWS)