CEBU, Philippines — Luwas nga nabalhin ang 88 ka pasahero ug 55 ka tipulante ngadto sa MV Camael ug MBCA MARLAUJEAN human ang ilang gisakyanan nga barko MV Starlite ang nasangad diha sa Danahon Bank, Calatuban, Talibon, Bohol kagahapon sa buntag.
Base sa taho sa Philippine Coast Guard District Central Visayas nga ang MV Starlite nagbiyahe kini gikan sa Surigao City niadtong Martes padulong sa Pier 1 sa Dakbayans sa Sugbo.
Ang mga pasahero nibutyag nga natanggong sila diha sa Danahon Bank alas 4:00 sa hapon niadtong Martes.
Si Lieutenant Commander Neil Rafael Ybera sa Naval Forces Central nibutyag nga ang mga naluwas nga pasahero gibalhin sa Pier 5 sa Cebu City.
Nadelatar ang pagpahigayon og rescue sa mga pasahero tungod kay hunas ug maglisod og duol ang maong barko ngadto sa MV Starlight Saturn.
Gibutyag ni Ybera nga 11 ka pasahero ang nibulontaryo nga magpabilin sa MV Starlight Saturn alang sa seguridad sa maong barko ug pagbantay sa mga kabtangan nga nabiyaan.
Nasayran nga ang mga pasahero gihatagan sa kompaniya sa barko nga nasangad og pagkaon ug uban pa nila nga panginahanglan lakip niini ang medical services. (BANATNEWS)