Fire Prevention Month buksan na karon

CEBU, Philippines — Gibuksan sa Mandaue City Fire Office (MCFO) kaganihang sayo sa buntag ang mga kalihokan sa pagtimaan sa “Fire Prevention Month” nga matapos sa Marso 31, 2023 pinaagi sa pagpatingog sa sirena sa ilang mga fire truck nga nagrekorida sa tibuok kabaranggayan sa maong siyudad.

Nunot sa maong pagpatingog sa mga sirena ilang gipahimangnoan ang mga molupyo sa kabarangayan nga dili maalarma tungod kay ang ilang pagpatingog sa sirena sa ilang mga fire truck tipik kini sa mga kalihokan sa pagpahinumdum sa katawhan nga likayan ang mahitabong sunog.

Naglakip sa pahimangno mao ang dili pagpataka og butang sa mga posporo o lighter ug uban pa nga mosiga aron dili duwaan sa mga bata.

Ug paglikay sa nagkatuali  nga linya sa kuryente o paggamit sa mga substandard nga mga butang nga naggamit og kuryente nga maoy mahimong hinungdan sa pag-ulbo sa kayo.  Samtang si Fire Officer 4 Guiller Pegarido sa Talisay City Fire Station nagkanayon nga ilaha nang gipangtapot ang mga tarpaulin sa nagkalain-laing dapit nga magpahinumdom sa katawhan nga mag-amping sunog.

Sa pagbukas nila sa fire prevention month sugdan nila kini sa naandan nga Santos nga Misa dayon mosunod ang motorkada sa pagpahibawo sa mga Talisaynon nga anaa na karon sa panahon nga grabe ang kainit.

Matud ni Pegarido nga magsilbi nila nga highlight sa ilang usa ka buwan nga kalihokanmao ang fire olympics nga ipahigayon diha sa mga tunghaan ug lain usab alang sa mga barangay, volunteers ug sa mga kompaniya. — Gabriel C. Bonjoc (BANATNEWS)