CEBU, Philippines — Nangandam ang kapolisan sa Dakbayan sa Sugbo sa gikatakda nga pagbisita ni Presidente Ferdinand “Bongbong” Marcos, Jr. atol sa ground breaking sa Cebu Bus Rapid Transit project karong Lunes.
Si Police Lieutenant Colonel Janette Rafter, deputy city director for operations sa Cebu City Police Office nagkanayon nga hugot sila nga nakig-alayon sa Presidential Management Staff kalabot sa security plans alang sa umaabot nga pagbisita ni Marcos.
Nakapahigayon na usab ang kapolisan og run through sa mga dapit nga posibleng adtoan ni Marcos.
Matud ni Rafter nga duna sila’y igong tawo aron mobantay sa seguridad atol sa mga kalihokan.
Ang Department of Transportation ni-award sa kontrata alang sa package 1 sa BRT project sa Hunan Road and Bridge (HNRB) Construction nga nagbase sa Hunan, China niadtong Nobiyembre 2022.
Magsugod ang package 1 sa Kapitolyo paingon sa Osmeña Boulevard ug paingon sa tuo sa Cebu South Bus Terminal sa Natalio Bacalso Avenue, Siyudad sa Sugbo. — BDB (BANATNEWS)