CEBU, Philippines — Anaa pa lang sa tunga-tunga’ng bahin sa buwan sa Pebrero niining tuiga apan ang Cebu City Transportation Office (CCTO) nakatala na og 4,226 ka traffic violators.
Kasagaran sa naisyuhan og citation tickets ang mga violation niini gilangkuban sa no stopping, no license, no registration, overloading ug uban pa.
Sa mao usab nga mga petsa naka-impound ang CCTO og 238 ka motorsiklo,172 ka e-bike, unom ka pribado nga sakyanan ug 312 ang na-clamp.
“Awhag namo sa mga naisyuhan og citation ticket sa pag- settle sa inyong violation sulod sa tulo ka adlaw aron dili kamo mapasakaan og kaso”, tipik sa mensahe sa CCTO.
Ang bag-ong opisina sa CCTO nahimutang diha sa South Road Properties, atbang sa Citi de Mare, El Pardo Road.
Bukas ang maong buhatan gkan sa alas 8:00 sa buntag hangtud alas 5:00 sa hapon gikan sa adlaw nga Lunes hangtud sa Biyernes.
Panawagan sa CCTO ngadto sa mga motorista nga motuman sa mga lagda aron mamentinar ang kahapsay sa kadalanan. — Rowena D. Capistrano