Duha ka minor nga nahadlok sa “mananangal” giatiman sa barangay
CEBU, Philippines — Padayon karon ang pagpaubos sa stress debriefing sa duha ka babaye nga menor de edad nga giingong nakakita og “manananggal” diha sa ilang dapit sa sitio Mangga, Barangay Dumlog, Dakbayan sa Talisay. Si konsehal Hydellin Rafols, chairman sa committee on Women, Family and Children sa Dumlog nibutyag nga sa iyang nakita sa mga menor de edad wala ra silay problema.
Gani eskedyul na nila ang psych evaluation ug ilang gisunod ang proseso aron mahuwasan sa ilang kahadlok ang mga bata.
Nagkanayon si Rafols nga padayon sab ang pagpatrolya sa ilang mga barangay tanod ilabi na sa pagsulod sa lugar kun diin giingong nagpakita ang “manananggal”.
Asoy pa niya nga ilang namatikdan nga mingaw na ang lugar panahon sa kagabhion ug sayo na nga mahipos ang mga batan-on.
Samtang sa laing bahin gipangsita sa kapolisan sa Dakbayan sa Talisay ang mga lalaki nga naghubo-hubo diha sa pampublikong lugar.
Si Police Lt. Col. Randy Caballes, hepe sa kapolisan nibutyag nga gisugdan nila kini sa buwan sa Enero diin 224 ka mga kalalakin-an ang ilang gibadlong ug gipailis sa ilang mga senina. Matud pa niya nga naa sa ordinansa sa siyudad ang pagsuot sa saktong senina sa publikong lugar.
Lakip sa ilang pagpahigayon sa Oplan Bakal, ila sab nga gibadlong ang mga nag inum og ilimnong makahubog diha sa karsada nga niabot kini sa 883.
Ilang narescue nga mga batan-on nga nakalapas sa curfew niabot sa 126 ug 181 nakalapas sa nagkalain-laing lokal nga ordinansa. (BANAT NEWS)
- Latest
