DOLE nipagawas og P2.81B alang sa beneficiaries sa TUPAD

CEBU, Philippines — Nikabat ngadto sa 2.81bilyones nga suholan ang napagawas sa Department of Labor and Employment (DOLE)-7 alang 600 mil ka trabahante sa Tulong Panghanapbuhay sa Ating Disadvantage/ Displaced Workers alang sa tuig 2022.

Ang TUPAD beneficiaries kasagaran anaa sa informal economy nga nagtrabaho napulo ngadto sa 30 ka adlaw magdepende sa ilang klase sa trabaho sama sa social community projects, economic community projects ug agro-forestry community projects.

Ang Cebu Province maoy nakatala og taas nga gidaghanon sa TUPAD beneficiaries diin niabot ngadto sa 280 mil ka trabahante ug nikabat ngadto sa P1.2 milyon ang kinatibuk-ang suholan.

Sa Bohol, niabot ngadto sa 130,386 ang beneficiaries ug nikabat ngadto sa P556,000 ang kinatibuk-ang sweldohan.

Samtang sa Negros Oriental adunay 97,200 ka workers ug nikabat ngadto P500 mil nga kinatibuk-an nila nga suholan.

Samtang 101,923 ka TUPAD workers ang nahatagan og P440 mil nga sweldo alang sa mga Siyudad sa Mandaue, Cebu ug Lapu-Lapu.

Sa Siquijor, ang DOLE-7 nipagawas og P82 mil nga pundo alang sa sweldohan sa 19,254 ka beneficiaries.

Matud ni Lilia Estillore, officer-in-charge sa DOLE-7 nga tanang beneficiaries gibayaran sa pinakataas nga minimum wage rate nga applicable sa Central Visayas nga tag P435 matag adlaw.

Dugang ni Estillore nga ang implementasyon sa TUPAD 2022 dakong hagit sa Central Visayas human naigo sa bagyong Odette tungod kay ang mga program focals apektado sa maong bagyo apan natigayon gihapon human ang maong proyekto nagtabang ilabi na sa mga lugar nga grabeng naapektohan.  (BANATNEWS)