Imahen ni Senyor Santo Niño mibisIta sa Siargao Island
CEBU, Philippines — Mibisita ang imahen ni Señor Santo Niño didto sa Siargao Island ug gihangop kini sa katawhan sa maong lugar.
Gipahibawo sa Basilica Menore del Santo Niño pinaagi sa ilang facebook page nga niadtong Enero 23 midangat didto sa Siargao ang imahen ni Sto.Niño de Cebu isip pilgrimage sa Diocese of Siargao.
Ang rector sa Basilica nga si Rev. Fr. Nelson Zerda, OSA maoy mikuyog sa imahen nga gikahinangop sa mga residente ingon man sa parish priest sa Santo Niño Parish, Dapa, nga si Rev. Fr. Jeremias Jadulco, DCS, kauban ang debotos ug mga miyembro sa Cofradia del Santo Niño de Cebu - Dapa Chapter.
Gi-prosesyon ang imahen gikan sa Dapa Port paingon sa simbahan.
Gihimo usab ang Sinulog dance sa kadalanan samtang gihimo ang prosesyon.
Nasayran nga kanunay gyud nga dagsaan sa mga tawo ang mga lugar nga bisitahan sa imahen sa balaang bata.
Ang mga rason niini mao ang ilang hugot nga pagpasalamat gumikan sa tanang grasya nga ilang nadawat.
Gani dinhi sa Sugbo normal na nga magbaha ang taga laing lugar nga dunay hugot nga debosyon kang Santo Niño.
Gisaulog niadtong Enero 15 ang kapistahan sa balaang bata ug karon lang tuiga nahibalik ang pisikal nga relihiyosong kalihokan nga nahunong og duha ka tuig tungod sa pandemya. (BANATNEWS)
- Latest
