Arce, estrikto sa tupi og uniporme sa mga sakop sa CTTO

CEBU, Philippines — Ginadili ang "pa-choy choy" alang sa mga tinugyanan sa Cebu City Transportation Office ug kinahanglan aduna kini saktong haircut, ingon man usab ang pagmintinar  sa kalimpyo sa ilang uniporme.

Nihimo og inspeksyon ang hepe sa maong buhatan nga si Raquel Arce ngadto sa iyang mga personnel kagahapon aron makita gyud ang hitsura niini samtang naka-uniporme.

Makita usab sa mga hulagway nga gipaambit ni Arce kay siya gyud mismo ang nangunay og tupi sa mga sakop sa CCTO nga tag-as og buhok.

Nakadawat og mga positibong feedback gikan sa netizens ang gibuhat ni Arce.

Segun sa FB post ni Arce,"Starting the Day right, inspection of CCTO PERSONNEL as to personality and good grooming. From prescribed uniform to haircut".

Gipatigbabaw sa maong departamento nga kinahanglan nga presentable gyud sila kanunay. Gipaneguro sa CCTO ang pagtuman sa ilang mga responsibilidad alang sa kahapsay.

Ang pagmintinar sa kahapsay sa kadalanan usa usab sa instrumento sa tinguha sa Dakbayan nga masusama kini sa Singapore. (BANATNEWS)