Mga student leader misuporta sa ordinansahon ni konsehal Gealon

CEBU, Philippines — Gisuportahan sa mga student leaders atol sa public hearing ang ordinansahon ni konsehal Rey Gealon nga maghatag og framework alang sa katungod ug kaayohan sa mga estudyante sa Dakbayan sa Sugbo. Miabot sa dul-an sa 30 ka student leaders gikan sa nagkadaiyang tunghaan sa Dakbayan sa Sugbo ang misuporta sa maong lakang.

Gihimo ang public hearing sa niaging adlaw ug tulin ang dagan niini gumikan kay pulos uyon ang nanambong nga mga tinun-an ug adunay ikaduhang hugna sa public hearing nga mahitabo sunod buwan. 

Suma pa sa Executive Director sa Cebu City Youth Development Commission (CCYDC) nga si Paolo Saberon nga gamit kaayo ang sentimento sa katawhan aron mahimong tulin ang implementasyon sa higayon nga mapasar ang balaudnon.

Ang gisugyot nga lakang nag-ulohan og “Students’ Rights and Welfare (StRAW) Ordinance of the City of Cebu” nga giduso na sa Committee on Laws, Ordinances, and Styling alang sa dugang pagtuon.

Dugang pa ni Saberon nga nahimong kabahin ang mga tinun-an sa gihimong konsultasyon sa unod sa maong ordinansahon.

Matud pa niya nga sa higayon nga makapasar kini, ang Dakbayan sa Sugbo maoy unang local government unit nga makaumol sa maong klase nga ordinansa.

Nahisgotan sa maong ordinansahon nga panalipdan ang mga estudyante gikan sa sistema sa edukasyon nga naglapas sa ilang mga katungod ug nagpabaya sa ilang kaayohan.

Maghatag usab kini og minimum nga mga sumbanan alang sa konsultasyon bahin sa tuition ug uban pang usbaw sa bayronon sa eskwelahan.

Silotan niini ang mga paglapas sa katungod sa mga estudyante ug maghatag ug mga mekanismo para sa makahuluganon nga partisipasyon sa mga proseso sa paghimo ug desisyon ug pagporma og mga polisiya nga makaapekto sa mga tinun-an.

Dili usab i-discriminate ang mga mabdos nga mga estudyante, certified reformed drug abusers, illegitimate nga mga anak, anak sa gawas sa kaminyoon, mga anak sa minyo apan bulag nga mga ginikanan, legal nga sinagop nga mga bata, ug mga anak nga gipadako sa nag-inusarang ginikanan.

Dugang pa, ang katungod sa mga estudyante sa pagporma, pagtabang, o pag-apil sa mga organisasyon, alyansa, o pederasyon kinahanglan nga ipatuman.

Samtang, ang katungod sa usa ka estudyante sa due process kinahanglang bantayan ug tahuron ilabina sa panahon sa pagdisiplina. (BANATNEWS)