P50 kada kilong sibuyas

CEBU, Philippines — Presyo sa sibuyas bombay gikatahong motibugsok hangtud P50 sa mga mosunod nga adlaw sumala pa sa usa ka magbabalaod.

Sa report sa Philstar.com, si Albay Rep. Joey Salceda namahayag niini kagahapong adlawa, ug matud pa niini mahitabo kini sa labing daling panahon.

“I think everything will normalize. There is a reversion and it will go back to P50. You can cut all my five fingers if it doesn’t go back to P50,” matud pa niini sa interbyu kaniiya sa usa ka telebisyon.

Wala hinuon siya motug-an kun unsay mga rason nganong motibugsok hangtud P50 ang matag kilog sa Sibuyas bombay.

Matud pa niya ang pagburot og maayo sa presyo sa sibuyas bombay “already defying the laws of gravity,” mao nga nagtuo siyang motibugsok sab kini dayon ngadto sa P50 nga gihulagway niyang “natural price” sa maong lamas.

Gibutyag hinuon sa kongresista nga adunay “cartel” sa mga negosyante ang nagsige og panago sa stocks sa sibuyas bombay maong limitado ang supply niini sa merkado nga ang resulta misaka ang presyo niini.

“There are seven (cartels) but I don’t want (to discuss them), but of course we are doing our own research. You go to Subic (Freeport), I can tell you there are about 50 containers filled with onions there,” butyag pa sa magbabalaod.

Siya mipasangil nga kining maong cartel, ginagmay ra og ipagawas nga sibuyas ngadto sa kamerkadohan.

“What essentially they did was ‘predatory pricing’ so they came in, brought the prices down, killed the local Filipino farmers and now they control the supply,” dugang pa niya.

Ang Department of Agriculture nga gipangulohan karon ni Presidente Ferdinand Marcos Jr. nakatutok sa paggukod sa mga agricultural product smugglers.

Tuyo niini nga masigurong dunay paigong suplay sa pagkaon nga mapalit sa ubos nga presyo, nga diin napakyas ang ahensiya pagsunod sa mandato niini.

Sa interbyu kang Marcos sa Bloomberg niadtong nakalabay nga Miyerkules, kini miingon nga kinahanglang makatarunganon ang sistema aron mapakgang kining ilegal nga importasyon sa mga pagkaon.

Ang sibuyas bombay sa Pilipinas mao na karon ang kinamahalan sa tibuok kalibotan nga miabot og P700 kada kilo.

Sa Carbon Public Market sa Cebu City, ang presyo sa bombay naa nalang sa P400 ngadto sa P500 depende sa klase niini.

Sa nakalabay nga tuig  2022, ang Bureau of Customs nakapahigayon og 107 seizures og agricultural products nga mokantidad og P1.23 billion. Ang P191 milyones niini mga gipalusot nga sibuyas bombay gikan sa laing nasud. (BANATNEWS)