Pista Senyor opisyal nitak-op pinaagi sa ‘Hubo’

CEBU, Philippines — Natapos na ang mga kalihukan sa 458th Fiesta Señor human gipahigayon ang traditional Hubo mass alas-4 sa kaadlawon kagahapong adlawa.

Ang Santos nga Misa gipangulohan ni Fr. Nelson Zerda, OSA, Rector sa Basilica Minore del Sto. Niño uban sa mga kaparian sa Archdiocese of Cebu nga gitambongan sa liboan ka mga debotos.

Sulod sa misa gipahigayon ang paghubo sa bisti sa Balaan nga Bata gikan sa sapot niini sa pista ngadto na sa ordinayo niini nga senina.

Matud pa ni Zerda, atol sa iyang homiliya, kinahanglan nga magpuyo kita nga mapaubsanon ug mangihatagon ilabi na ngadto sa atong mga kaigsuonan nga mas labing nanginahanglan.

Dugang pa ni Zerda, angayan nga ipakaylap ang maayong balita, diin sa paghubo nailisan na kita sa senina ni kristo nga napuno kaayo sa grasya.

Human sa santos nga misa, gipahigayon ang hamubo nga sinulog traditional dance nga giubanan sa bagang duot sa katawhan uban sa pagpangulo sa San Diego Dance troupe.

Si Fr. John Ion Miranda, OSA, ang tigpamaba sa Basilica Minore del Sto, Niño, nitug-an nga aron pagpalambo sa debosyon adunay team gikan sa basilica ang molarga padulong sa Ozamis dala ang imahe sa Santo Niño alang sa kalihukan sa fiesta sa maong lugar.

Dugang pa ni Miranda, aduna pa usab sila lain team ang mobiyahe pa usab sa lain lugar aron dalhon usab ang replica sa Balaan nga Bata aron sa paghatag ug kahigayonan sa mga dili makaari sa siyudad nga makayukbo sa Santo Niño.

Mapasalamaton si Mirando sa task force fiesta señor ug sa tanan mga volunteers nga nitabang aron magmalampuson ug malinawon ang kasaulogan sa fiesta, diin gidugok sa liboan ka mga magtutuo.

Gitug-an ni Miranda, naa sa dili mominos sa siyete mil ka mga debotos ang nitambong sa Hubo mass sulod lang kini nga bahin sa basilica minore del sto. Nino wala pay labot ang naa lang sa gawas.

Si Perlita Arriba, 54, gikan sa Barangay Baliwagan, Balamban ang nibiyahe gikan sa ilang lugar ala-una sa kaadlawon aron makatambong sa Hubo mass.

Dugang pa ni Arriba, aduna na siyay mga gipangayo kaniadto sa Balaan nga Bata nga gipanghatag na ug padayon usab niyang gipangayo  nga hatagan sila ug maayong panglawas ang ilang kabanay ug tanan katawhan tibuok kalibutan. (BANATNEWS)