Bisperas sa pista sa brgy Suba ug Pasil nahimong alegre

CEBU, Philippines — Gidugok sa bagang duot sa mga tawo ang bisperas sa kapistahan sa Barangay Suba ug Pasil ning Dakbayan sa Sugbo, human sa gihimong fluvial procession kagahapon.

Ang katawhan nag-atang na daan sa karaan nga fish port aron makalantaw sa dili mominus 50 ka mga sakayan nga niapil sa fluvial procession.

Apil sa misakay sa maong mga sakayan ang Hermano ug Hermana Mayor 2023 ug ingon man ang kaparian sa Santo Niño Parish, sa Barangay Suba.

Matud pa ni Barangay Captain Jojo Sable sa Barangay Suba, mahinangpon siya nga sulod sa duha ka tuig hingpit na gayud nga nabalik ang kalihukan sa fiesta Señor.

Dugang pa ni Sable, kung sa nanglabay nga katuigan gagmay nga baroto ang nanguyog sa pasil sa fluvial karon mga dagko na ug base sa iyang nasayran dili kini libre ug adunay mga bayad ang manguyog ngadto sa mga sakayan.

Bisan kinsa ang mahimo nga makapamista sa ilang lugar ug maoy iyang hangyo ngadto sa  katawhan nga inay botelya sa ilimnon ang iisa mas maayo nga mga Santos lang ug likayan usab ang grabeng kahubog panahon sa fiesta.

Ang procession sa pasil nituyok sa Barangay Suba ug Pasil diin nahimong alegre human ang mga residente sa lugar mipasirit gayud ug tubig nga mas nakapahugyaw sa tanan.

Malaumon si Sable nga hingpit nang mawala ang COVID-19 ug wala nay dagkong katalagman nga masinati ang Sugbo. (BANATNEWS)