Kanhi polis, kapuyo sikop

CEBU, Philippines — Nasikop sa gipahigayon nga buy bust operation sa Drug Enforcement Unit sa Talisay Police Station pinangulohan ni Police Captain Elwood Ebona ubos sa kamadoan ni Police Lt. Col. Randy Caballes ang usa ka kanhi polis ug kapuyo niini Miyerkules sa gabii diha sa Sitio Molave , Brgy. Tabunok Talisay City.

Giila ang mga dinakpan nga si Esmeralda  Pacaldo Esmeña ,59, nga maoy target sa operasyon ug si Susibio Blasa Narciso ,61, kanhi polis nga residente sa Barangay Mambaling, Cebu City.

Matud pa ni Caballes nga tulo ka semana nila namonitor ang  illegal na kalihokan sa duha ug maka dispose sila og 100 gramos nga shabu matag semana.

Giingon sa Mambaling ug Talisay sagad  ang iyang hatdan  sa illegal nga drugas. Dugang pa ni Caballes nga nagsugod ang illegal nga negusyo sa babaye niadtong bulan sa Hunyo sa miaging tuig.

Gikan sa gihinganlan og “Vigan” ang source sa iyang shabu.

Atol sa maong operation nakuha sa posisyon sa mga dinakpan ang 14 ka medium nga putos sa shabu nga gisulod sa coin pouch nga motimbang og 70 gramos nga mo balor og P476 mil.

Ang mga dinakpan pasakaan og kasong kalapasan sa RA 9165 Comprehensive Dangerous Drug Act of 2002.

Sa pikas bahin, 280 ka malampusong operasyon kontra ilegal nga drugas ang kapolisan sa Central Visayas nga niresulta sa pagkasikop sa 351 ka drug personalities ug nakakompiskar og 4,443.38 gramos sa illegal nga drugas nga gilangkuban sa shabu nga niabot og 4,038.88 grams nga mobalor og P27.4 million ug 404.60 grams sa marijuana nga nagkantidad og P48,552.

Gihimo ang maong operasyon gikan Disyembre 19, 2022 hangtod sa Enero 9, 2023.  Gibutyag ni Police Brigadier General Jerry Bearis, Director sa Police Regional Office-7 nga ang paglusad sa BIDA program o Buhay Ingatan, Droga’y Ayawan sa Department if Interior and Local Government dako og natampo matud pa sa accomplishments sa PRO-7 sa all-out war against illegal drugs.

Ang maong programa naghatag sab matod pa sa PRO-7 og oportunidad sa pagpalig-on sa partnership sa komunidad ug pagpalapad sa network ug tinubdan sa impormasyon sa paggukod niadtong mga drug personalities sa rehiyon.

“We are all in this together towards a great environment for our children and for the best version of our country’s future,” matud ni Bearis. (BANATNEWS)