CEBU, Philippines — Aron dili mosamot og kahuot ang bagang duot sa katawhan nga moagi sa mga access roads diha sa South Road Properties atol sa Sinulog Festival 2023 walay tugotan nga makapaninda sa kilid sa kadalanan.
Kini maoy gibutyag sa chairman sa Sinulog 2023 Executive Committee nga si Konsehal Phillip Zafra.
Ang komitiba pinaagi sa Prevention Restoration Beautification and Enhancement (PROBE) team mohimo unya og inspeksyon sa mga dalan padung sa SRP aron pagsusi sa sitwasyon aron makahimo og mga lakang nga makatabang aron di maghuot ang mga tawo.
Pipila sa mga access roads sa SRP mao ang naa sa Cabreros sa Barangay Mambaling ug sa Barangay Inayawan, naa sab ang SRP Access road gikan sa Mambaling padung sa SM Seaside.
Nagmalaumon ang konsehal nga mokooperar ang katawhan aron mahimong hapsay ang maong kadalanan atol sa Sinulog.
Nasayran nga gipaabot ang pagdagsa sa mga tawo sa maong kalihokan ilabi na nga nahunong ang pisikal nga pagpasundayag niini sulod sa duha ka tuig tungod sa pandemya.
Mao usab kini ang labing una nga higayon nga himoon sa SRP ang maong engrandeng kalihokan.
Gipaabot nga ang mga vendors ug mga tawong namuyo duol aning mga access roads nangandam na og mga puhonan aron makapaninda.
“Ang labing importante nga mag-enjoy ta . Mo-focus ta sa positive side ,ug mag-ampo ta nga mahatagan ta og maayong panahon atol sa maong okasyon,” matud pa ni Zafra.
Gisugdan na usab sa niaging semana ang pagpaayo sa maong mga access road . (BANAT NEWS)