Destabilisasyon walay kamatuoran – AFP

CEBU, Philippines —  Gisangon na sa Armed Forces of the Philippines ngadto sa Philippine National Police ang paghimo og imbestigasyon mahitungod sa matud pa nanggawas nga memorandum nga nag-ingong gibutang sa high alert ang tibuok pwersa sa kapolisan sa nasud nunot sa mass resignation sa mga kawani sa Department of National Defense.

Ang AFP mipasalig nga walay destabilisasyon o mga iregular nga mga kalihukan sa ilang organisasyon karon sumala pa sa report gikan sa Philstar.com.

Una niini, ang PNP mihimakak nga duna silay gipagawas nga susamang memorandum nga nikatap online pipila ka oras human sa AFP change of command ceremony diin milingkod isp Chief of Staff Gen. Andres Centino.

Si Centino nakalingkod na sa maong posisyon apan gihulipan pipila ka buwan na ang nakalabay, karon gibalik kini sa maong posisyon.

“The memo did not come from us and the PNP already said the memo is not official so we will leave it up to them to conduct an investigation,” sumala pa ni Col. Medel Aguilar, tigpamaba sa AFP  atol sa interview kaniya sa Super Radyo DZBB kagahapon.

Ang maong kwestyonableng memorandum nga nagdala og PNP letterhead, giingong gipirmahan sa usa ka Police Col. Alikhan Yusop, mipahibalo nga ibutang sa “full alert status” ang tanang sakop niini niadtong adlaw nga Sabado.

Ang pagalerto matud pa sa tibuok pwersa sa PNP tungod kini sa pag-resign sa mga kawani sa DND sa Camp Aguinaldo, gimandoan sab matud pa sa maong memo ang tanang mga sakop nga monitoron ang tanang lihok sa tropa sa AFP sa ilang mga hurisdiksyon.

Ang PNP mipagawas og klaripikasyon mahitungod sa maong memo ug mihimakak nga may kalabotan kini sa mga kalihokan diha sa AFP. Matud pa sa PNP ang pagalerto sa ilang mga sakop partikular sa Metro Manila, may kalabotan kini sa “Walk of Faith” nga prosisyon pahinungod sa umaabot nga Pista sa Itom nga Nazareno sa Manila.

Niadtong adlaw nga Sabado, ang AFP mibutyag nga hapsay ug tulin ra napahigayon ang change of command gikan ni Lt. Gen. Bartolome Vicente Bacarro ngadto ni Centino.

“The AFP assures everyone that everything is normal. The movements of PNP assets are part of the simulation exercises in preparation for the Feast of the Black Nazarene,” pagpamatuod pa sa pamahayag gikan sa AFP.— IBM (BANAT NEWS)