30 police officials mi-resign

CEBU, Philippines — Nipirma na sa ilahang courtesy resignation ang 30 ka police officials sa Police Regional Office (PRO)-7 isip tubag sa apelar ni Department of Interior and Local Government (DILG) Secretary Benjamin “Benhur” Abalos Jr. nga mosumetir sa ilahang courtesy resignation ang tanang full colonels ug generals sa Philippine National Police isip kabahin sa ilahang paagi paglimpyo sa han-ay sa kapulisan gikan sa mga nalambigit sa illegal drug trade.

Ang 30 ka police officials gilangkuban sa duha ka Police Brigadier Generals ug 28 ka mga Police Colonels.

Sila si Police Brigadier General Jerry Bearis, Director sa Police Regional Office-7 ug Police Brigadier General Elizalde Quiboyen ang Director sa Regional Internal Affairs Service (RIAS)-7.

Ang 28 ka mga Police Colonels mao kini ang mga kasamtangang hepe sa nagkalain-laing police units sa PRO-7 ingon man City Director ug Provincial Directors.

Gipahigayon ang pinirmahay sa courtesy resignation sa conference room sa Police Regional Office-7 sa Camp Sergio Osmeña, siyudad sa Sugbo kagahapon sa hapon.

Matud ni PRO-7 Director Brigadier General Jerry Bearis human sa announcement ni DILG Secretary Abalos sila ang unang mipahibawo sa full support sa maong tinguha hinungdan nga mipirma dayon sila sa courtesy resignation.

Gihulagway ni Bearis nga ang taas morale sa opisyales sa PRO-7 tungod kay usa ka maayong balita ang gihimo ni Abalos aron malimpyuhan ang han-ay sa kapulisan batok sa mga police officials nga nalambigit sa illegal nga kalihukan.

Bisan og nipirma na og courtesy resignation ang mga nahisgutang mga opisyales magpadayon sila sa ilahang trabaho samtang nagpaabot sa resulta sa evaluation sa Committee of Five nga giumol aron maoy mosusi kun ang mga police officials nalambigit sa illegal o wala.  “As per guidance by the DILG, there will be the committee of five to scrutinize our integrity to ensure that all members of the PNP are in good shape, with integrity of heart para nasa good hands ang community,” sigon ni Bearis.

Giklaro niini nga dili maapektuhan ang operasyon sa PRO-7.

Ang maong courtesy resignation ipadala kang Abalos ug gi-address kini kang Presidente Ferdinand Marcos Jr.

Usa sa mga nipirma ang Force Commander sa Regional Mobile Force Battalion (RMFB)-7 Police Col. Ronan Claravall kinsa dili pa lang sab dugay na-promote sa pagka full colonel. “We will submit ourselves for investigation or whatsoever at kung napatunayan at may involvement po kami so be it. Pero kami dito sa PRO-7 malinis po kami,” ni Claravall pa.

Matud pa nga mao kini ang pamaagi nga gusto ni Marcos aron matangtang sa serbisyo ang mga opisyales sa PNP nga nalambigit sa ilegal nga drugas.

Gikataho nga kadtong i-reinstate balik human masusi sa ‘committee of five’ ilang mga record nagpasabot nga wala sila malambigit sa ilegal nga drugas, kadtong dili na i-reinstate ikonsiderar na silang ni-resign ug makadawat gihapon sa ilang mga benepisyo.

Wala pa hinuon usab ibutyag kun unsay mahitabo niadtong mga full colonels ug generals nga di gihapon mo-resign. (BANATNEWS)