CEBU, Philippines — Naugdaw ang karaan nga bodega sa kompaniya sa rattan nga nahimutang diha sa Sitio Rattan, Barangay Tanke, Dakbayan sa Talisay kagahapon sa kadlawon.
Si Senior Fire Office 4 Guiller Pegarido sa Talisay City Fire Station nagkanayon nga alas 4:33 sa kadlawon gipaubos nila sa first alarm ang maong sunog diin pagka-alas 4:48 sa kadlawon ilang nakontrolar ang kayo.
Matud ni Pegarido nga nagklase-klase lang nga butang nga dali masunog ang gipangsulod diha sa bodega.
Ang nasunogan mao ang karaan nga kompaniya sa rattan ug sila naghinay-hinay sa pagtrabaho niini aron pag-abli og balik ubos sa lain nga pangalan sa kompaniya.
Sa ilang pakisusi, wala nay electrical wiring sa bodega apan ilang nabantayan nga adunay daobanan sa dapit nga mao’y ilang pagduda nga ang agipo niini nilupad ug natugpa diha sa nagpundo nga mga butang sa bodega.
Gibana-bana nga niabot ngadto sa P315 mil ang danyos sa sunog ug walay gikataho nga adunay naangol sa maong insidente. (BANAT NEWS)