CEBU, Philippines — Gihangop ni Archbishop Jose Palma uban sa kaparian sa Archdiocese of Cebu ang pagdagsa sa mga tawo nga mitambong sa ika-89th nga pista sa Patrona sa Dakbayan sa Sugbo ang Our Lady of Guadalupe, kagahapon sa buntag.
Matud pa sa Arsobispo kinsa maoy nangu sa misa nga bisan og naa pa ang COVID-19 apan nagkaminus na kini angayan nga ipasalamat sa Ginoo nga nahimong pisikal ang pagpahigayon sa kalihukan sa pista nga kaniadto gihimo ra pinaagi sa online.
Nagkanayon si Palma nga unta ang pagtuo sa tawo nga hugot kaayo, makita kini sa uban nga mahimong saksi nga importante kaayo ang Ginoo sa atong kinabuhi.
Dugang pa sa Arsobispo, ang pagtuo nga gisaulog human sa 500years of Christianity, mao ang pagtuo nga magbunga sa gugma, ang gugma nga magpakita sa maayong buhat ug ang maayong buhat nga magbunga ug kalinaw.
Gidasig usab sa Arsobispo ang mga magtutuo nga padayon nga moapil sa mga kalihukan sa simbahan ug sigurohon lang usab ang pagsunod gihapon sa mga health protocols.
Samtang si Mayor Michael Rama sa Dakbayan sa Sugbo kinsa mitambong sa santos nga misa mahinangpon sa kalihukan sa fiesta ug mipaabot usab sa iyang pagtimbaya sa kalampusan niini. (BANATNEWS)