CEBU, Philippines — Nagkasabot ang mga sakop sa Sangguniang Panlungsod nga makigtigom kang Mayor Michael Rama aron matuki ang items nga hatagan og prayoridad alang sa giduso nga budget sa tuig 2023.
Tumong sa konseho nga makig-alayon sa executive department sa pagdeterminar sa mga proyekto nga angay iapil sa final budget nga mahimong aprobahan.
Nasayran nga gihimo niadtong Lunes ang unang adlaw sa marathon budget hearing diin adunay mga konsehal sa siyudad ang nangutana sa tinubdan sa pundo alang sa P50 bilyones nga budget proposal sa sunod tuig.
Usa sa gikwestiyon mao ang projection alang sa real property taxes (RPT) isip tinubdan sa pundo.
Base sa proposal, gusto sa executive department nga mokuha og P40 bilyones gikan sa RPT nga makolekta sa tuig 2023.
Karong tuiga nikabat ngadto sa P1.25 bilyones ang gi-target sa siyudad nga makolekta sa RPT.
Ang pag-usbaw gibase sa gisugyot nga tax revision ordinance nga gisang-at ni Konsehal Noel Wenceslao kinsa nagtinguhang usbawan ang RPT human sa pipila ka tuig nga wala mag-adjust sa rates ang siyudad.
Ang maong sugyot ni Wenceslao pending pa kini sa Sangguniang Panlungsod.
Nagkanayon si Konsehal Rey Gealon nga dili angayan nga mag-agad sa approval sa revised tax ordinance.
Matud ni Gealon nga wala pa naaprobahan ang maong tax revision mao nga lisod kon mao kini agdon.
Sa iyang bahin, si Konsehal Jocelyn Pesquera nagkanayon nga bisan kon mapasar ang tax revision mag-agi gihapon og taas nga proseso ang kagamhanan sa siyudad sa actual nga pagkolekta sa buhis base sa gipausbawan nga rates.
“They cannot automatically collect because they have to change all the tax declarations, they have to send new notices of assessment. Without notice of assessment they cannot collect”, pasabot ni Pesquera. (BANAT NEWS)