Temporaryong kapuy-an sa mga biktima sa sunog gitrabaho na

CEBU, Philippines — Gisugdan na ang pag trabaho sa temporaryong kapasilongan sa mga biktima sa sunog sa sitio Paradise sa Barangay Looc, Siyudad sa Mandaue.

Ang giugmad nga temporary housing naa mahimutang sa bakanteng luna nga nahimutang duol sa Cebu International Convention Center (CICC) nga adunay gilapdon nga upat ka ektarya nga gipanag-iya sa kagamhanan sa siyudad.

Una na nga gipasalig ni Mayor Jonas Cortes nga posibleng mahuman ang proyekto sa dili pa ang pasko.

Sa nasayran dul-an sa 700 ka pamilya nga biktima sa sunog nga tempraryo nga gipahiluna sa evacuation center diha sa Ceasar Cabahug Elementary School sa Barangay Looc.

Si Camelo Basaka pangulo  sa City Social Welfare and Services (CSWS) miingon nga ang mga tag-iya og panimalay nga biktrima sa sunog makadawat og P10,000 ug P5,000  ang madawat sa mga nag-abang.

Gikan sa kagamhanan sa maong siyudad ang maong pinansiyal nga hinabang apan dugang pa nga mga hinabang ang gihatag usab sa pribadong mga tawo.

Samtang gitugyan usab ni Lapu-Lapu City  Mayor Junard “Ahong”  Chan ngadto sa kagamhanan sa dakbayan sa Mandaue ang tseke nga nagkantidad og P1 milyon nga tabang alang sa mga nasunogan sa barangay Looc.

Una na nga midonar si Mayor Chan sa iyang usa ka buwan nga suweldo ngadto sa mga biktima sa sunog. (BANAT NEWS)