Botika gilungkab sa liloan, P115 milyones nga kita nakawat

CEBU, Philippines — Usa ka pharmacy sa lungsod sa Liloan nga nahimutang sa Acacia Drive, Purok Tamarong sa barangay Jubay ang gilungkab ug nadala ang kantidad nga P115mil nga kita sa maong botika niadtong Miyerkules sa buntag, Nobiyembre 30.

Ang sales assistant sa botika nga si Charlie Quingco maoy nitahu sa kapolisan og nadiskubrihan nga giguba ang likod nga bahin sa botika nga gituhuang didto miagi ang mga kawatan.

Matud pa ni Police Senior Master Sergeant Jason Gayo, Desk Officer on Duty sa Liloan, nagpadayon pa karon sa pagpahigayon ug imbestigasyon ang ilang imbestigador.

Sa pasiunang pakisusi nasuta nga didto miagi sa likod nga bahin sa gibakbak nga bongbong ang mga kawatan ug miguba sa vault sa botika.

Dugang pa ni Gayo, ang likod nga bahin sa maong botika, bakante nga luna ug kasagbotan ug dili kaayo maagian ug tawo.

Blangko pa ang kapolisan sa background sa mga nihimo sa krimen ug wala pa masuta kun pila ka tawo ang misulod sa maong botika. —/MEL (BANAT NEWS)