CEBU, Philippines — Moabot ngadto sa P6 milyones ang danyos sa sunog nga niulbo sa usa buhatan sa sud sa Cebu City Sports Complex diha sa R.R Landon St. ning Dakbayan sa Sugbo kagahapon sa buntag adlaw nga Biyernes.
Ang sunog naglambigit ug mixed materials nga iya sa Cebu City Sports Complex.Hingpit kining napawong alas 9:57 na sa buntag.
Wala hinuon makadako og maayo ang sunog apan nagbilin kini og P6 milyones ka pesos nga danyos. Base sa talaan sa Cebu City Fire Department dili mominos sa 25 ka mga individual ang apektado sa maong sunog.
Sumala pa ni Fire Officer 3 Emerson Arceo, imbestigador sa Cebu City Fire ang maong lugar diin niulbo ang sunog gigamit kini kanhi nga dormitoryo apan giabandonar kini panahon sa pandemya.
Ang maong dormitoryo daghang sulod nga mga kutson nga higdaan sa mga athletes sa siyudad sa panahon nga gigamit pa kini hinungdan nga baga kaayo ang aso atol sa pag-ulbo sa sunog.
Naghimo pa og imbestigasyon bahin sa pagduda sa mga nagduma sa maong pasilidad nga kuryente ang hinungdan sa pag-ulbo sa kayo. Atol sa maong sunog, nahunong usab ang klase sa mga tinun-an sa Abellana National High School diha sa ubos nga bahin sa maong pasilidad. Nabalda sab ang mga trabaho sa nagkadaiyang buhatan diha sa Cebu City Sports Center kay wala man usab silay kuryente tungod sa maong sunog.
Sa pikas bahin, gihatagan og hinabang sa City Social Welfare and Services (CSWS) sa Siyudad sa Mandaue ang mga pamilya Sector 2, Sitio Kalubihan sa Barangay Pagsabungan sa Siyudad sa Mandaue nga nahitabo sa miaging Huwebes sa hapon.
Naglakip sa mga hinabang nga gihatag mao ang disaster kits, mga sapot nga naglakip sa T-shirts, ug shorts, mga underwear alang sa babaye ug lalaki, face towels, mga banig, habol, mga hygiene kits, sabot para laba ug para kaligo, shampoo ug toothpaste.
Gihatagan usab sila og food pack, bugas, mga linata nga pagkaon nga naglakip sa mga sardinas ug uban pa.
Base sa report sa Mandaue City Fire Office (MCFO) miulbo ang sunog alas 12:46 sa udto sa miaging Huwebes. Milanat lang kini og 15 minutos ug nakontrolar kini dayon.
Apan tungod kay sagad sa mga balay ginama sa gaay, paspas ra kaayong nikatap ang kalayo. — /IBM (BANAT NEWS)