Kapin 4 mil ka trabaho nagpaabot sa job fair sa Lapu-Lapu

CEBU, Philippines — Kapin sa 4,500  ka mga bakanteng trabaho ang nagpaabot  sa pagahimoon nga job fair nga pasiugdahan sa Public Employment Service Office (PESO) sa siyudad sa Lapu-Lapu nga gikatakda sa Nobiyembre 18,  2022.

Kini ang gibutyag ni Kim Francisco nga maoy pangulo sa PESO sa kagamhanan sa siyudad sa Lapu-Lapu.

Matud pa niya nga 21 ka mga local employers ug duha usab niini ang overseas employment agencies ang mosalmot sa job fair nga pagahimoon sa The Outlet Fiesta sa Barangay Basak sa maong dakbayan.

Nunot niini giawhag ni Francisco ang mga nangita og trabaho sa pagdala og giandam na daan nga biodata o resume aron maka-apply kini sa nagkadaiyang kompaniya nga nanginahanglan og mga trabahante.

Kahinumdoman  niadtong Oktubre 7, 2022  ang kagamhanan sa siyudad sa Lapu-Lapu ang nagpasiugda og special job fair sa paghatag og kahigayonan niadtong mga trabahante sa Mactan Export Processing Zone (MEPZ) nga natangtang sa ilang trabaho. —Rowena D. Capistrano (BANATNEWS)