CEBU, Philippines — Gipatigbabaw karon sa nagkadaiyang organisasyon sa kabatan-onan nga nagbase sa Dakbayan sa Sugbo ang pagtabang sa mga programa sa kagamhanan ug tipik kini sa gilusad nga Youth Bayanihan sa kagamhanan sa Dakbayan.
Matud sa pangulo sa Cebu City Youth Development Commission Paolo Saberon nga ang Youth Bayanihan nagpakita sa paghigugma ug pagpangga sa kabatan-onan sa ilang yutang natawhan. Dul-an sa 50 ka youth organizations sa nagkadaiyang dapit sa siyudad ang kasamtangang narehistro sa CCYDC.
Pipila sa gibuhat sa youth sector sa siyudad mao ang pagtabang sa tree planting ug cleanup drive. Gawas niini, aduna usab sila’y gibuhat nga mga relief operation alang sa mga naapektohan sa kalamidad.
Gidasig nila ang ubang kabatan-onan sa paghatag sa ilang partisipasyon sa nagkadaiyang kalihokan nga makahatag og kaayohan sa komundidad.
Sayo pa, gitigom sa CCYDC ang tanang 80 ka barangay sa Siyudad sa Sugbo aron buhaton ang local youth development plan alang sa mosunod nga tulo ka tuig.
Nihimo na usab sila og imbentaryo sa tanang mga kapunongan sa kabatan-onan sa siyudad.
Nasayran nga lakip sa girehistro sa maong buhatan ang mga campus-based organization, out-of-school-youth nga mga grupo, grupo sa mga persons with disability (PWD), LGBT youth organization, civic professionals, faith-based organization, ug uban pa. Gipili usab ang mga inbidwal nga mamahimong youth sectoral representative sa local youth development council. Ang local youth development plan magsilbi nga sumbanan sa paghimo og mga programa alang sa mga kabatan-onan.
Ubos sa SK Reform Law, gimandoan ang matag local government unit nga magbutang og local youth development council.
Matud ni Saberon nga supportive kaayo si Mayor Michael Rama sa mga programa alang sa kabatan -onan. (/BDB) (BANAT NEWS)