CEBU, Philippines — Mamaligyaay og lechon sa Dakbayan sa Carcar giingong nibalik na usab sa modus nga tapok-an ang mga mamalitay aron mapugos kini og palit.
Usa ka netizen ang nipadayag diha sa social media sa maong kasinatian diin dili buwagan ang mamalitay sa manindahay aron mapugos kini og palit sa ilang baligyang lechon.
Ang maong modus nahunong kini kaniadto human sa mga reklamo gikan sa mga mamalitay nga taga laing lugar ug mohapit diha sa lugar.
Ang nahisgutang netizen nibutyag nga mosiaw ang mamaligyaay ilabi na langyaw ang moabot ug gustong mopalit og lechon. “Kamo mga tindera og inasal ayaw ninyo tapok-e ayaw sab ninyo kabyuni. Imbis mopalit mi usa ka tibuok nga inasal usa nalang ka kilo kay gisamokan mi”, tipik sa post sa netizen.
Laing netizen ang nipadayag sa susama nga kasinatian ug giingong bahaw nga lechon ang ilang napalit.
Si Mayor Patrick Barcenas nagkanayon nga karon pa siya nakadungog sa maong mga alegasyon ug wala siya’y namatikdan dihang niadto siya sa merkado ug nikaon og lechon.
Hinuon giawhag ni Barcenas ang mga netizen nga adunay reklamo nga mo contact kanila aron matabangan sa ilang himuong imbestigasyon kalabot sa maong reklamo.
Sa laing bahin, andam na ang City of Talisay-Chamber of Commerce sa ilahang ikaduha nga trade fair diha sa plaza atbang sa Talisay City Hall nga ipahigayon sa sunod buwan. Si Cyril Velasco, presidente sa mga negosyante sa siyudad nagkanayon nga sa pagkakaron anaa nay nagkuha og booth diin niabot na kini ngadto sa 71 porsyento.
Nag-target sila og 74 ka booth nga mao lang ang ilahang pwede nga ipagamit.
“Gusto ta og quality nga trade fair mao na nga ato lang gi-limit ang booth to cater sa atong mga bisita”, matud ni Velasco.
Nasayran nga makita gihapon ang cosplay, car show ug uban pa nga mga produkto nga gikan sa mga miyembro sa chamber.
Ang nahabilin nga 21 porsyento sa mga booth mahimo na kini nga ihatag ngadto sa mga dili miyembro nga negosyante nga Talisaynon ug sa bisan dili taga Talisay. (/BDB) (BANAT NEWS)