Liquor ban ug anti-noise ordinance ipatuman duol sa BAR exam venues

CEBU, Philippines — Sugod alas-12 ganinang kaadlawon gi-implementar sa Cebu City Police Office ang Executive Order No. 14 ni Cebu City Mayor Michael Rama nga nagmando og liquor ban sulod sa 100 meter radius sa mga tunghaan nga pahigayunan sa BAR Examination.

Karong adlawa, Nobiyembre 9, magsugod na ang  BAR Examinations diha sa University of Cebu Banilad Campus ug University of San Carlos main.  Moabot sa 1,672 ang mokuha sa BAR Examination, ang 1,152 niini adto sa UC Banilad Campus ug 520 niini sa USC Main.

Mahitabo ang sunod nga BAR Exams Nobiyembre 13, 16 ug 20, ang mga molapas sa liquor ban pamultahon og P1,000 kun wala’y ikabayad mag community service.

Matud ni Police Col. Ireneo Dalogdog, City Director sa Cebu City Police Office alas 3 sa kaadlawon ugmang adlawa ipakatap na ang 102 ka mga polisug force multipliers gikan sa Station 1 ug 4 diha sa duha ka unibersidad.

Ipatuman sab sa CCPO ang Anti-Noise Ordinance sa siyudad sa 100 meter radius sa duha ka tunghaan ug ang gidili sab ang kusog nga pagbusina aron dili makabalda sa mga mokuha sa  BAR Examination. (BANATNEWS)