248 ka mag-uuma sa Cebu City naapektohan sa bagyong Paeng
CEBU, Philippines — Niabot ngadto sa 248 ka mag-uuma sa Dakbayan sa Sugbo ang naapektohan a bagyong Paeng.
Kini ang gipahibalo ni Cebu City Agriculturist Joey Baclayon.
Matud ni Baclayon ang tanang lagutmon ug ornamental nga pananom nga naapektohan sa bagyo naapil sa insurance sa Philippine Crop Insurance Corporation.
Gibutyag ni Baclayon nga sa 248 ka mag-uuma adunay 16 niini sa mountain barangays ang naapektohan.
Ug niabot ngadto sa 104.05 hectares nga luna ang apektado hinungdan nga gawas sa insurance hatagan usab ang mga apektadong mag-uuma og mga liso ug fertilizers.
Nasayran nga ang mga naapektohan nga mga pananom mao ang sweet corn, cut-flower, ornamental, talong, sili, kamatis, lettuce, repolyo, sibuyas ug pipino.
Matud usab ni Baclayon nga niabot ngadto sa 80 porsyento ang kadaot sa maong mga pananom tungod sa bagyo.
Ang mga barangay nga naapektohan naglangkub sa Adlaon, Babag , Binaliw, Borbon, Budlaan, Boot, Busay, Cambinucot, Guba, Kalunasan, Lusaran, Mabini, Malubog, Pamutan, Paril, Pulangbato, Pung-ol, Sapangdaku, Sinsin, Sudlon 1, Sudlon 2, Sirao, Tabunan, Taptap ug Tagbao. BDB (BANATNEWS)
- Latest
