CEBU, Philippines — Pabilin pa gihapon nga wala mailhi sa kapolisan ang mga mamumuno nga nagtigbas patay sa magtiayon sa Barangay Dapdap sa Lungsod sa Compostela niadtong Lunes sa gabii Oktubre 31, 2022.
Si Police Lieutenant Andrew Rellanos, hepe sa Compostela Police Station miingon nga padayon pa ang ilang imbestigasyon alang sa pag-ila sa mga mamumuno ug sa pagsuta usab sa hinungdan sa maong pagpanigbas.
Napalgan nga naligdas na sa dalan ang patay’ng lawas sa mga biktima nga giila nga sila si Cecilio Camanse Depositario, 40 anyos ug asawa niini nga si Aicel, 39 anyos nga pulos nakabaton og tinigbasan sa tangkugo ug nawong nga gituohang hinungdan sa ilang hinanaling kamatayon.
Dugang pa ni Rellanos nga ilang gisusi ang posibling panagbangi sa karsada tungod kay pulos man nagsakay og motorsiklo ang mga biktima ug ang wala mailhi nga mga mamumuno.
hinuon padayon pa sila nga nanghipos og kasayuran nga naglakip sa background sa mga biktima diin ang bana nagtrabaho isip construction worker ug ang asawa nagtrabaho usab sa Mitsumi sa Barangay Sabang sa Siyudad sa Danao .
Gitataw ni Rellanos nga ilang gipaabot nga adunay motumaw nga mga nakasaksi sa maong hitabo aron makatabang sa pagsulbad sa krimen ug mahatagan og hustisya ang mga bikitma. (BANATNEWS)