VECO motabang pagsulbad sa suliran sa power supply sa kabukiran
CEBU, Philippines — Mapasalamaton si konsehal Phillip Zafra ngadto sa kadagkuan sa Visayan Electric gumikan sa gipadayag niini sa pagpangita og pamaagi alang sa pipila ka suliran sa kabukiran ilabi na ang kabahin sa problema sa linya sa koryente.
Sa miaging adlaw, nitambong ang konsehal sa usa ka panagtigom kauban sila si VECO President and COO, Engr. Raul Lucero, Cebu City Resource Management And Development Center (CREMDEC) head Allan Millana Lugo Bautista ug pipila ka mga representante sa National Irrigation Administration (NIA).
Lakip sa ilang gihisgotan ang pipila ka problema sa power supply nga nakaapekto sa water irrigation facilities sa barangay Paril, Agsungot, Malubog, Pung-ol Sibugay, Pulangbato ug Sirao.
“Remedial measures will be undertaken and that the problem will be addressed soon. Thanks VECO” matud pa ni Zafra.
Una niini gibutyag ni Zafra nga walay puas ang pag-umol niya og koordinasyon ngadto sa nagkadaiyang stakeholders aron mahatagan og solusyon ang pipila ka mga problema nga nasinate sa mga konsituwente sa dakbayan.
Lakip sa gihingusgan nga programa ni Zafra mao ang pagpasuga o pagmontar og koneksyon sa koryente sa kabukiran nga wala pa naabtan og koryente.
Gipasalig ni Zafra nga maningkamot ang kagamhanan aron maabtan og linya sa koryente ang maong mga dapit tungod kay suma pa niya nga kun ngitngit ang usa ka dapit, peligro usab kini sa mga dautang elemento.
Lakip usab sa gilihok karon sa iyang buhatan kauban ang Department of Public Services (DPS) mao ang paghulip sa mga nangaponder nga suga sa poste. (BANAT NEWS)
- Latest
