CEBU, Philippines — Gipaubos sa site inspection ang Rizal Memorial Library and Museum building sa mga miyembro sa Order of the Knights of Rizal aron sutaon ang kadaot nga naangkon human sa bagyong Odette niadtong Disyembre 16, 2021.
Base sa taho sa Cebu Public Information Office, ang Order of the Knights of Rizal moboluntaryo sa pag-ayo sa mga kadaot sa istraktura.
Si Bryner Diaz, pangulo sa Cebu City Cultural and Historical Affairs Office (CHAO), nagkanayon nga human sa bagyo gihimo ang initial nga pag-ayo sa mga naguba sa edipisyo apan limitado lang ang ilang pundo ug mao kini ang ilang usa sa mga hagit ilabi na sa pag-ayo sa Sinulog Hall.
“Mapasalamot kaayo mi nga naa sila dinhi para motabang”, matud ni Diaz.
Nasayran nga human sa assessment sa Knights of Rizal sugdan dayon ang repair works.
Upat ka Knight of Rizal chapters ang mosalmot sa pag-ayo sa edipisyo nga walay magasto ang kagamhanan sa dakbayan.
Matud ni Diaz nga restoration lang ang himuon tungod kay ang pagpatuman sa mga kausaban magkinahanglan og pagtugot sa National Historical Commission of the Philippines (NHCP).
“This is also an important cultural property man sab so dili gyud siya usbon, and mag-require pa og permits and taas kaayo ang process”, padayag ni Diaz.
Samtang si Mayor Michael Rama, nihagit sa grupo nga humanon ang proyekto sa dili pa ang iyang adlawng natawhan karong Oktubre 28.
Nasayran nga sa maong petsa ang CHAO mopahigayon usab og indigay sa “Balak” nga Cebuano nga hubad sa balak ni Dr. Jose Rizal nga nag-ulohan og “Mi Último Adiós” hinungdan nga paningkamotan gyud nila nga mahuman ang proyekto. —BDB (BANATNEWS)