Kapolisan mohangyo sa mga tunghaan nga magbutang og gwardiya

CEBU, Philippines — Aron masiguro ang seguridad sa mga tinun-an hangyuon sa kapolisan sa Dakbayan sa Talisay ang nagdumala sa mga tunghaan nga kung mahimo mag-hire sila og gwardya nga maoy mag man sa gate.

Si Police Lt. Col. Randy Caballes, hepe sa kapolisan sa Talisay niingon nga adunay mga tunghaan sa Talisay nga adunay CCTV camera ug gwardiya apan daghan pa sab ang wala niini.

Gipasabot ni Caballes nga bisan og anaa sila nga mga otoridad apan ang mga gwardya mao gyud ang first line of defense kung pananglit adunay mga tawo nga mopasakit sa mga tinun-an ug magtutudlo sud sa mga tunghaan.

Sila sa kapolisan nangagpas lang niini human sa nahitabo sa nasud sa Thailand nga gi ataki sa armadong tawo ang usa sa mga tunghaan nga miresulta sa kamatayon sa 34 ka indibidwal lakip na ang mga tinun-an.

Una niini, si konsehal Eduardo “Digul” Gullas III, chairman sa Committee on Education nipalabang og resolusyon sa pag awhag sa matag tunghaan nga magbutang og CCTV camera lakip nasab ang electronic ID.

Ang electronic ID mao ang usa ka kahimanan nga direktang mohatag og mensahe sa ginikanan kung ang ilang mga anak nisulod ba sa tunghaan o wala o nigawas na ba sa ilang tunghaan.

Si Caballes nitataw nga makigtagbo unya siya sa kadagkuan sa mga tunghaan aron personal sila nga hangyuon sa iyang laraw alang sa ilang seguridad ug sa mga tinun-an. MEL (BANATNEWS)