Kanhi Cebu City Zoo subling buksan

CEBU, Philippines — Niadtong adlaw’ng Sabado nagtinabangay ang mga kawani sa Cebu City Hall uban ang mga volunteer sa nagkalain-laing grupo sa paghawan ug paglimpiyo sa kanhi Cebu City Zoo.

Nagkanayon si Lemuel Felisario, operations head sa Cebu City Hall Satellite Center nga ubos sa buhatan sa Barangay Affairs Office (BAO) himuon na nga “Cebu City Wild Life Protection and Rescue Resources Facility” ang pangalan inig abli na niini pagbalilk.

“Since we have this volume of people coming over volunteers, public and private sectors, makita nato diha nga atong gisiguro ma-clear gyud ang main pathways unya para makahawan sila atong mga tawo nanilhig”, matud ni Felisario.

Giklaro ni Felisario nga sa kadako sa dapit dili dali ang pagpahiuli niini diin ang tinguha nga kadtong mga mananap nga samdam o nasakit anha dad-on ug ibutang alang sa dugang pag-atiman ug pagpaalim.

“Wala pa ta kaayo gyud naka-concept nga zoo ni.  We might consider other places, ngadto sa mountain barangays, posible nga adto gyud didto (ang zoo)…Here, right now it becomes a nursery, or it could become a sanctuary para sa atong mga gi-rescue nato nga mga mananap”, padayag ni Felisario.

Sukad gipasirad-an ang kanhi Cebu City Zoo niadtong tuig 2016 duha ka mananap ang nahibilin ug ang uban gibalhin na og laing pasilidad ngadto sa ubang lugar. BDB (BANATNEWS)