St. Remigius of Rheims giila nga tinudban sa pangan nga San Remigio
CEBU, Philippines — Nipasar og resolusyon ang Konseho sa San Remigio isip pag-ila kang “St. Remigius of Rheims” isip maoy tinubdan sa ngalan sa munisipalidad sa San Remigio, Cebu. Si Konsehal Alfie Reynes Corominas -Gonzales maoy nagduso sa maong resolusyon nga gihatagan dayon og suporta sa mga kaubanan niya sa konseho sa maong munisipalidad.
“Kini usab pinaagi sa pag-abag sa atong inila nga pari nga si Fr. Ronald Angel Anthony “Tata” Torres ug ingon man sa maabtikon nato nga Youth Focal na si Shaun Soria, ingon man sa walay puas nga suporta sa konseho.,” matud pa sa konsehal.
Ang pag-ila sa maong Santos gatangag usab sa tema nga “San Remigio, Modelo sa Pagka-santo, Kauban sa Pag-alagad sa Hiniusang Panaw”.
Tipik sa unod sa napasar nga resolusyon, ginganlan kaniadto ang maong dapit og “ Kanghagas” ug gipulihan sa termino nga San Remigio nga gi establisar ni anhing Gobernador Rafael Burmingham Echague pinaagi sa Superior Decree niadtong November 21, 1863.
Nagkanayon si Gonzales nga naandan na sa Kagamhanan sa San Remigio nga mohatag gyud og bili sa kasaysayan ilabi na kun dunay kalabotan sa ilang lugar .
Nailhan usab ang ilang dapit isip usa sa mga bisitahon sa mga turista gumikan sa mala-paraiso nga palibot niini.
Ang San Remigio adunay kapin sa 20 ka resort ug pulos na kini nakabalik sa ilang operasyon human naapektohan kaniadto sa pandemya.
Kanunay nga dagsaan ang maong dapit sa mga bisita ilabi na panahon sa weekend ug holidays. MEL (BANATNEWS)
- Latest
