CEBU, Philippines — Nasakmit ang armas ug shabu sa kapolisan sa Lungsod sa Cordova sa gipahigayon nga Synchronized Enhanced Managing Police Operations (SEMPO) ug nasikop ang duha ka drug personality ug duha ka sugarol. Ang mga dinakpan naila nga sila si Jackson Dela Cerna ug Rizalde Agbo nga pulos hingkod ang panuigon ug molopyo sa maong dapit.
Si Police Major Michael Gingoyon, hepe sa Cordova Police Station miingon nga 31 ka gagmay nga paketeng shabu ang ilang nasakmit ug usa ka kalibre 38 nga armas.
Samtang duha ka pusher og shabu ang nadakpan sa buy bust operation sa kapolisan sa barangay Yati, Lungsod sa Liloan.
Giila ang mga nadakpan nga mao sila si Anthony Aquillon Nation, 47 anyos nga taga Barangay Tayud sa maong lungsod ug Fidel Perocho Camporedondo, 62 anyos nga taga Sitio Casia sa barangay Bankal sa Siyudad sa Lapu-Lapu. Nakuha gikan sa duha ka dinakpan ang mokabat sa P47, 600 nga shabu ug P2, 500 nga buy bust money. —MEL (BANATNEWS)