CEBU, Philippines — Bisan og niretiro na sa pangagamhanan apan aktibo gihapon sa panerbisyo sa publiko si kanhi environment secretary Roy Cimatu kinsa mao na karoy usa sa mga tigtambag ni Cebu City Mayor Michael Rama aron buhion og balik ang pito ka sapa sa dakbayan.
Si Cimatu kinsa adopted son sa Cebu atol sa COVID-19 crisis nanghinaot nga ma-rehabilitate ug ma-replicate sa mga kasapaan sa siyudad ang nahimo niini sa Boracay, Manila Bay, Marikina River ug Cagayan River.
Apan giangkon ni Cimatu nga daghan og kinahanglang trabahoon aron kini mabuhat dinhi kun itandi sa iyang gihimo didto sa Boracay sanglit mas dako ang Cebu City.
Sa mga milabay nga mga semana ang siyudad nakasinati og grabeng pagbaha nga resulta sa pag-awas sa kasapaan sa dakbayan ingon man pagbara sa mga agianan sa tubig. Gawas pa, wala nay mga isda ang maong mga sapa kay patay na.
“Very difficult dito, very difficult because the area of the Boracay is only the portion of City of Cebu, ang ano lang dun there is only 4 kilometers white beach and all those nanduon sa easement para dito ay dapat ma-move, 4 kilometers lang ito. Ito (Cebu City) how many kilometers dito, mahirap so I cannot give you time table really here but if in our generation we cannot solve this problem let the next generation continue but we, we will really exert all our effort and energy including the cooperation of the people of Cebu City to achieve this goal, a greener seven rivers,” ni Cimatu pa.
Unang buhaton nila mao ang paglimpyo ug pagpalawom ug pagpalapad sa pito ka mga sapa sa siyudad karong Sabado, Septiyembre 17, 2022 diin mao sab unya ang paglusad sa Task Force Gubat sa Baha.
Tinguha sab ni Cimatu nga i-clear gikan sa mga illegal structures ang mga kasapaan sagad niini mga commercial establishments ug dili lang mga informal settlers.
Ang siyudad mangita og relocation site alang sa mga informal settlers.
Gipahibawo sab ni Cimatu nga ang Department of Environment and Natural Resources (DENR) motabang sa siyudad ug mo-issue sab og notice of violation sa maong mga istraktura.
“If there are some illegal structures there then they are violating the law, so ito ngayon ang tinitignan naming,” sigon ni Cimatu.
Giawhag sa kanhi Environment Secretary ang mga structure owners nga nakalapas sa balaod nga mag-self demolish nalang.— IBM (BANATNEWS)