Tulo nakuryentihan, Butuanon River niawas

CEBU, Philippines — Tulo ang naangol human nangakuryentihan samtang nakasinati og grabeng pagbaha ang nagkadaiyang mga barangay sa Dakbayan sa Mandaue tungod sa pag-awas sa tubig sa Butuanon River gumikan sa pagbunok sa kusog nga uwan kagahapon sa hapon.

Ang pagbaha niresulta sa pagkatanggong sa daghang mga pasahero ug mga sakyanan ang wala makalahos sa ilang biyahe tungod sa kataas sa tubig, ang uban kanila napagngan pa og makina.

Daghan sa mga tawo nga nangatanggong sa kilid sa mga karsada ang gitabangan pinaagi sa mga trak sa siyudad sa Mandaue aron sila makasakay, mitabang sab ang pipila ka mga pribadong trak aron makasakay ang mga tawo.

Atol sab sa paghapak sa kusog nga hangin giingong adunay mga transformers sa poste diha sa Barangay Maguikay ang nibuto duol sa usa ka dakong tindahan sa mga hardware.

Samtang nagusbat ug nadala sa tubig sa sapa ang Tabok Footbridge sa Barangay Maguikay tungod sa kadaghan sa mga nabara nga mga basura ug gapnod samtang kusog ang bul-og sa tubig.

Sa Sitio Li-ong sa Brgy. Alang-Alang nisulod sa kabalayan ang tubig baha ug dunay banay nga napugos pagdala sa lungon sa gihaya nilang kabanay ngadto sa ikaduhang andana sa ilang balay tungod nilapas na sa tawo ang kataas sa tubig.

Nangatanggong ang mga sakyanan ug mga tawo padung sa Marcelo Fernan Bridge tungod sa baha.

Samtang duna say laing upat sab ka transformers ang nibuto sa dalan M.C. Briones  sa maong dakbayan nga niresulta sa pagkakuryente sa tulo ka mga tawo hinungdan nga gi-cordon dayon ang maong dalan ug wala paagii.

Si Mayor Jonas Cortes sa post niini sa Facebook, siya personal nga misusi diha sa Mandaue City Hospital ang kahimtang sa mga nakuryentihan sa nibuto nga transformer sa M.C. Briones sa Maguikay.

Matud pa sa post niini, mga sakop sa emergency response team sa Brgy. Ibabao-Estancia ang mga nakuryentihan.

“Tungod sa naangkon nga mga paso sa lawas niini, naka desisyon ta nga ibalhin nato sa pribado nga hospital aron maatiman siya sa specialista. Kada responde sa atong mga emergency responder sa nga katalagman, nag ung-ong na sad ilahang kinabuhi sa disgrasya. Mao nga atoa silang iapil sa atong pag ampo nga unta ang mga tig luwas nato… maluwas sad sa disgrasya.” Matud pa sa post ni Cortes.

Samtang dunay nasigpatang buhawi sa kadagatan taliwala sa Lapu-Lapu City ug sa Lungsod sa Liloan kagahapon sa hapon sa wala pa magsugod ang pagbunok sa uwan.

Gawas sa Mandaue City nakasinati sab og susamang problema sa lungsod sa Consolacion ug Talisay City.

Ang mga sakop sa Local Disaster Risk Reduction and Management Office sa maong lungsod mi-rescue sa usa ka pamilya diha sa Purok 3, Sampaguita, Barangay Lamac kagahapon sa hapon tungod kay nisulod na ang tubig diha sa ilang balay samtang nagbunok ang uwan sumala pa sa post sa LGU Consolacion Facebook page.

Talisay City

Nitabon ang mga yuta ug bato sa karsada sa Sitio Languyon, Barangay Manipis, Dakbayan sa Talisay kagahapon sa hapon atol sa pagbunok sa uwan hinungdan nga dili kini maagian og mga motorista.

Si Kapitan Joselito Laurente sa Manipis nibutyag nga nakasinati sila sa kusog nga uwan hinungdan nga nibigay ang bukid ug mitabon sa karsada.

Dali sila nga niresponde ug gipugngan ang mga motorista nga moagi.

Apan aduna gyud uban nga motorista nga morisgo hangtud nga usa ka sakyanan ang nalubong ang ligid, maayo nalang nga dali nila kini nga nahaw-as.

Wala ra hinuoy mga tawo ug panimay nga naigo sa midahili nga yuta ug bato.

Samtang nisaka sab ang tubig sa sapa sa Mananga hinungdan nga naapektahan ang mga residenteng namuyo daplin niini diha sa Barangay Tabunok, Dumlog ug Biasong. Ang tubig misaka hangtud sa hawak sa tawo hinungdan nga namakwit ang mga residente sa luwas nga lugar.

Wa sab masalbar ang usa ka panimay nga nasudlan na gyud sa tubig sa sapa. Sa pagsuwat sa balita wala ra hinuoy mga tawo nga naanod. (BANAT NEWS)