CEBU, Philippines — Karong adlawa, Sabado, Septyembre 10, 2022 ipanghatag ang financial assistance alang sa mga nasunogan sa Barangay Ermita, Quiot ingon man sa Punta Princesa.
Nasayran nga ang Sitio Bato sa Ermita, Sitio Sto. Niño sa Quiot ug Sitio Tuburan, Trinidad, Arca ug Mercom naigo sa sunog sa mga miaging mga buwan.
Sigon sa pangulo sa Department of Social Welfare and Services Portia Basmayor moabot sa 98 ka pamilya sa Barangay Quiot, 169 families sa Ermita ug sobra sa 500 ka pamilya sa Punta Princesa nga nasunugan ang makadawat og financial assistance gikan sa Kagamhanan sa siyudad sa Sugbo.
Matud ni Basmayor nga P20,000 ang madawat nga ayuda sa structure owners nga naigo sa sunog samtang P10,000 sa renters ug sharers diin ang distribution adto himuon sa Ermita Gym, Quiot Gym ug Mormons Church.
“Last nalang ni siya nga ayuda. Nakahatag naman ta sa housing, nakahatag naman ta sa mga goods, relief goods, kani nalang financial ang last…Naa man tay mga proseso unya gi-process sa accounting,” sigon ni Basmayor.
Sa mga nasunugan nga mo-claim sa ilahang financial assistance si Basmayor miasoy nga kinahanglan nila magdala og valid Identification Card, kun nasunog ang ID pwede mokuha og police clearance, voter’s certification nga naay nawong sa mokuha ug katong form nga gipa-fill out sa DSWS ngadto nila.
Giklaro ni Basmayor nga dili itugot ang authorization letter, kun kinsa kadtong nakalista mao ra gyuy pwede mokuha.
Sa mga nasunugan nga dili makakuha sa ilahang financial assistance ugmang adlawa si Basmayor miasoy nga hatagan sila og lima ka adlaw aron makakuha sa ayuda.
Giawhag sa DSWS ang mga mokuha sa hinabang pinansiyal nga i-andam ang tanang dokumento nga gikinahanglan aron dili na magbalik-balik, ipa-photocopy daan ang ID nga naay signature ug uban pa.