CEBU, Philippines — Miabot sa 76 ka indibidwal nga taga barangay Tangke ug North Poblacion sa siyudad sa Naga ang benepisyaryo sa programa nga Toilet for Every Home Project ubos sa Zero Open Defecation Program.
Ang mga benepisyaryo gipasabot sa programa ug gikuha ang ilang pagsanong nga sila komitado nga mobuhat sa ilang parte sa programa.
Ang nahisgutang programa iya pa ni kanhi mayor Kristine Vannesa Chiong ug gipadayon sa iyang amahan nga si mayor Valdemar Chiong.
Tumong niini aron ang katawhan dili magpataka og pabuhagay sa ilang hugaw nga makapapeligro na hinuon sa panglawas sa kabataan ug sa kumonidad.
Ang siyudad sa Naga maoy mohatag sa materyales alang sa pag trabaho sa pansayan lakip na ang septic tank.
Samtang ang benepisyaryo mao ang motrabaho sa proyekto aron wala nay bayranan sa labor.
Magpadayon ang maong programa sa Naga hangtud nga makapahimulos ang tanang residente ug mahatagan og hamugaway nga kalabayan sa ilang hugaw. — /MEL (BANAT NEWS)