Niambak sa ambulansiya

CEBU, Philippines — Namatay ang usa ka wala hiilhing lalaki nga gikatahong niambak gikan sa ambulansiyang magdala unta kaniya ngadto sa tambalanan tungod gitabangan kini og kulata sa grupo sa mga habal-habal drivers.

Ang krimen gikatahong nahitabo diha sa Sitio Acacia, Barangay Cogon East sa Lungsod sa Carmen alas- 7 pasado ang takna sa miaging Domingo sa gabii.

Si Police Major Eric Gingoyon, hepe sa Carmen Police Station miingon nga gipasanginlang misuway og lugos sa usa ka babaye diha sa kalibonan  ang maong wala hiilhing lalaki.

Nagsul-ob og t-shirt ug dunay mga tattoo kini sa tuong bukton apan walay nakuhang ID gikan kaniya.

Dugang pa ni Gingoyon nga gikarga unta og ambulansiya ang maong lalaki sa mga mirespondeng emergency medical service tungod sa mga bun-og nga naangkon sa pagkulata sa mga drayber.

Apan matud pa samtang nagdagan ang ambulansiya kalit lang kining miambak padung sa gawas nga maoy hinungdan sa pagkapantok sa ulo niini sa sementadong dalan.

Si Gingoyon miingon nga nakita pa kini nga mibarog ug misutoy sa pagdagan pahilayo apan tungod kay ngitngit nadasmag  kini sa kongkretong koral ug natumba.

Wala na kini mobangon pa. Gituohang  mao kadto ang nakapagrabe sa naangkon niining mga bun-og ug nakaingon sa iyang hinanali nga kamatayon.

Walay gihatag nga impormasyon kabahin sa matud pa babayeng giingong gisuwayan niini og lugos diha sa kalibonan nga maoy hinungdan nga gitabangan kini og kulata sa mga tawo. —IBM (BANATNEWS)