CEBU, Philippines — Gidayeg sa Cebu City Council ang Office of the Building Official (OBO) sa pag-commit alang sa pagproseso sa mga building permit sulod sa usa ka oras gamit ang digital technology.
Si Konsehal Mary Ann delos Santos nipasiugda og resolusyon kalabot sa maong butang nga giaprobahan sa konseho niadtong Miyerkules.
Ang OBO nga gipangulohan ni Architect Florante Catalan migarantiya nga usa ka oras ra ang maximum processing time alang sa pag-isyu og building permit sa siyudad.
Kini nga pasalig nahimong posible pinaagi sa pagsagop sa OBO-Information System (OBO-IS) Version 3 nga gi-develop sa Management Information and Computer Services (MICS) sa kagamhanan sa dakbayan, diin dungan ang pagproseso sa application documents lakip ang architectural, structural, mechanical, ug electrical plans.
Matud ni delos Santos, ang pagsagop sa digital technologies ug process automation sa opisina sa gobyerno, makahatag og episyente, kasaligan, ug cost effective nga delivery sa mga serbisyo ngadto sa publiko.
Dugang pa niya, ang pribadong sektor maoy nanguna sa pagsagop sa digital technologies sa nasud pinaagi sa e-commerce, online payments, telemedicine, ug uban pa, hinungdan nga ang publiko nanawagan sa gobyerno nga sundon kini.
Ang konsehal miingon nga ang OBO dalaygon nga misanong niini nga panawagan pinaagi sa gipadali nga timeline ug gipasayon nga pagproseso sa mga aplikasyon sa permit pinaagi sa paggamit sa digital technology ug innovative strategies.
“Such action deserves public recognition, as well as emulation by other departments of the City of Cebu,” segun ni delos Santos.