CEBU, Philippines — Ang bag-ong napili nga auxiliary bishop sa Sugbo Ruben Labajo wala pa masayod sa iyang assignment apan dako ang kahigayonan nga anhi dinhi sa Dakbayan sa Sugbo.
Ang kasamtangang parokya ni Labajo mao ang St. Francis of Assisi sa Lungsod sa Balamban.
Kini ang gibutyag ni Labajo human sa iyang episcopal ordination nga gitambongan sa gatusan ka obispo ug magtutuo lakip sa iyang kabanay.
Gipahigayon ang maong kalihokan kagahapon sa alas 9:00 sa buntag diha sa Cebu Metropolitan Cathedral.
Si Archbishop Jose Palma maoy ordaining prelate samtang sila si Most Reverend Charles John Brown, Papal Nuncio to the Philippines ug Most Reverend Dennis Villarojo sa Diocese of Malolos maoy co-ordaining prelate.
Nipaambit sa homily sa episcopal ordination si Villarojo kinsa nahimo usab nga classmate ni Labajo.
Gibutyag ni Villarojo ang mga kaagi nila ni labajo hangtud na sa ilang paglawig sa pagka-obispo niini. Gipadayag ni Villarojo ang pagkamapaubsanon sa bag-ong obispo ug gani nakig-uban kini sa mga kabus sa unang pagpakita niini ngadto sa iyang pagka-obispo.
Gidasig ni Villarojo si Labajo nga padayon sa panultihon nga “walk humbly with God”.
Si Labajo sa iyang bahin, mapasalamaton sa bag-ong gasa ug tahas nga gihatag kaniya apan padayon nga nihangyo ngadto sa katawhan ug sa iyang mga brother priest nga ilakip siya sa pag-ampo sa matag adlaw.
Matud ni Labajo nga sama sa iyang naandan nga moduol gihapon siya sa tanan panahon sa atong langitnon nga inahan ang Birhen Maria.
Gibutyag ni labajo nga wala pa siya masayod asa ang iyang assignment apan adunay kahigayonan nga mobiya na unya siya ngadto sa Balamban tungod kay daghan man usab siyang tahas nga sagubangon.
Samtang si Palma sa iyang bahin, nagkanayon nga padayon pa sila karon nga nagtuki sa assignment ni Labajo. —/BDB (BANAT NEWS)