CEBU, Philippines — Giawhag ni City Administrator Suzanne Ardoso, isip chief operating officer ang mga kawani sa city hall nga motutok ug mobuhat og maayo sa ilang mga trabaho isip lakang padulong sa tumong ni Mayor Michael Rama nga Singapore-like Cebu City.
Human sa flag ceremony kagahapon sa buntag niawhag si Ardoso sa mga empleyado sa city hall kalabot sa panumpaan nila kada Lunes sa pagpuyo sa kinabuhi sa usa ka public servant nga dili lang kini i-recite apan kinasing-kasing ang pagsulti.
“We are public servants, we are privileged to be of service of Cebuano people, dili kay kita maoy serbisyohan”, ni Ardoso pa.
Si Ardosa nagkanayon nga ubos sa tumong nga Singapore-like Cebu City kinahanglang magsugod kini sa gugma sa nasud, sa siyudad, ug disiplina sa kaugalingon.
Matud ni Ardosa nga kong magtinabangay ang tanan makab-ot ang tumong nga masusama sa Singapore ang siyudad.
Atol sa ilang paglibot sa mayor ug pipila ka government officials ngadto sa dalan sa B. Rodriguez, Osmeña Boulevard, ug parte sa N. Bacalso kutob sa Cebu City Medical Center nasayran nila nga daghang estraktura ang nakaali sa sidewalks ug kinahanglan kining gub-on.
Lakip usab sa mga proyekto nga gustong ipatuman sa mayor mao ang seryosong pagpatuman sa 3-meter easement alang sa mga suba ug ubang agianan sa tubig sa siyudad.
Base sa taho sa Cebu City News and Information gisugdan na karon sa mga personnel sa city government ang pagguba sa mga balay diha daplin sa Kinalumsan River nga gitukod sulod sa 3-meter easement alang sa mga agianan sa tubig.
Subay niini, ang Cebu City Disaster Risk Reduction and Management Office (CCDRRMO) personnel nga gipangulohan ni Harold Alcontin nagbutang na og “Flood Prone Area” signage diha sa taytayan nga motabok sa Kinalumsan River sa N. Bacalso Avenue. BDB (BANATNEWS)