CEBU, Philippines — Hugot ng ipatuman sa Cebu City ang three-meter easement sa tanang mga kasapaan ug kabaybayonan sa siyudad maong gimando na ni Cebu City Mayor Michael Rama ang pagsugod og clearing operations sa mga daplin niini.
Ang mga molupyo nga maapektahan ibalhin sa mas luwas nga lugar aron dili sila maapektahan panahon nga kusog ang uwan tungod sa pagsulya sa tubig.
Kini human sa kusog nga ulan sa miaging gabii, Agosto 4, nga miresulta sa pag-awas sa mga suba, apil na ang Kinalumsan River diin duha ka tawo ang naanod sa nagbul-og nga tubig niini, hinuon luwas ra ang magtiayong nagpuyo sa balay nga naanod. Sumala pa sa taho sa Cebu City News and Information, gipangunahan ni Mayor Rama ang usa ka Zoom meeting kagahapon kauban ang mga department heads nunot sa kusog nga ulan ug pagbaha nga nasinati sa ubang bahin sa siyudad. Siya nimando kang Atty. Collin Rosell nga mogama og executive order alang niini. Matod sa mayor, ang mga tunghaan himoong temporary evacuation center sa mga bakwit samtang nagpaabot sa pagbutang og container vans sa South Road Properties (SRP) isip temporaryong kapuy-an. Nasayran nga ang mga nagpuyo sa kilid sa Kinalumsan River nga nakalapas sa tulo ka metros nga easement gibayran na kaniadto sa siyudad aron sila mopahawa . Ang pundo gikan sa Department of Public Works and Highways apan wala gihapon sila mipahawa sa lugar. Tungod niini, gimandoan ang Prevention Restoration Beautification and Enhancement team nga i-demolish na dayon ang mga estraktura aron walay mga tawo nga mabutang sa peligro sa matag ting-ulan.— UV Intern/IBM (BANAT NEWS)