CEBU, Philippines — Duha ka bata kinsa giingong uyoan ug pag-umangkon ang nalumos diha sa Butuanon River habig sa Zone Ahos, Barangay Paknaan, Dakbayan sa Mandaue kagahapon sa buntag.
Ang mga nalumos mao sila si Shane Calderon, 5-anyos ug Alexander Calderon, 7-anyos, pulos residente sa maong lugar.
Ang Barangay Disaster Risk Reduction Management Office sa Paknaan nakadawat og tawag kalabot sa maong insidente hinungdan nga dali kini nila nga girespondehan ug matud ni Carmen Castañeda wala nay sinina ang maong mga bata. Si Castañares nagkanayon nga ang mga bata dali kini nga gidala ngadto sa tambalanan apan gideklara kini sa doktor nga wala nay kinabuhi nga naabot sa tambalanan.
Si Patrolman Segundo Aro sa Police Station 3 sa Mandaue City Police Office nagkanayon nga ang maong insidente nataho diha sa ilang buhatan mga alas 3:45 na sa hapon ug sa oras sa pagsuwat niining balita nagpahigayon pa sila og imbestigasyon sa hitabo. —BDB (BANATNEWS)