CEBU, Philippines — Usa ka lalaki kinsa nadala sa kusog nga balod sa dagat ang nalumos diha sa Sitio Dubai, Barangay Dumlog, Dakbayan sa Toledo, niadtong Domingo sa hapon.
Ang nalumos mao si Kent Joan Desuyo, 31-anyos, minyo, taga Purok 4 Barangay Camen sa maong siyudad.
Base sa imbestigasyon sa kapolisan sa Dakbayan sa Toledo ang ig-agaw ni Desuyo nibutyag nga sa wala pa ang maong insidente nag-picnic pa si Desuyo uban sa iyang mga pamilya diha daplin sa baybayon.
Matud ni Police Staff Sergeant Fredenil Cabañero, desk officer sa Toledo City Police Station nga giingong nananghid si Desuyo nga maligo sa dagat ug dihang naligo na kini nabantayan nga nadala siya sa kusog nga bawod sa dagat hinungdan nga dali kini nga gitabang.
Ang kabanay ni Desuyo nagpakitabang usab sa City Disaster Risk Reduction Management Office ug dali nga gidala ngadto sa tambalanan apan wala na kini kinabuhi. BDB (BANATNEWS)