CEBU, Philippines — Usa ka ginang nga mokuha unta og kwarta sa usa ka money transfer ang nakaanak og ahat diha mismo sa maong establisamento diha sa lungsod sa Argao kagahapon sa buntag.
Ang ginang nga nakaanak mao si Malyn Rufo, 27, taga Looc, Barangay Poblacion sa maong lungsod.
Matud pa ni Erick Matus, responder sa MDRMMO sa Lungsod sa Argao giingong alas-8:40 sa buntag gabati na ang maong ginang apan miadto gihapon kini diha sa maong money transfer aron pagkuha sa iyang kwarta hangtud nga didto na kini nakaanak.
Sumala pa ni Matus, pagabot nila sa lugar naghigda na ang maong ginang sa semento nga gitabang sa mga trabahante ingon man sa pipila ka customer apan nigawas na ang bata diha sa iyang tagoangkan.
Ilaha kining gilimpyohan ug giatiman una gidala sa tambalanan. Dugang pa ni Matus, luwas ug health ra ang bata nga gidala nila ngadto sa tambalanan ug nagpabilin pa kini ang managinahan alang sa dugang pa nga pakisusi.
Gibutyag ni Matus, padulong na unta ang maong ginang sa tambalanan tungod kay talianak na kini apan nihapit una aron kuhaon ang kwarta nga gipadala para kaniya. —IBM (BANATNEWS)