Lima ka suspetsadong durugista sikop sa buy-bust

CEBU, Philippines — Usa ka drug den ang napuhag ug lima ka tawo ang nasikop atol sa gipahigayong pagpangronda sa mga sakop sa  Philippine Drug Enforcement Agency-7 diha sa Barangay Carreta, Dakbayan sa Sugbo niadtong Miyekules sa gabii.

Ang mga operatiba sa PDEA -7 Cebu Provincial Office, Regional Intelligence Unit (RIU) ug City Intelligence Team (CIT) ang nipahigayon og buy-bust operation.

Nasikop sa maong operasyon ang duha ka subject ug giingong tigmentinar sa drug den nga sila si Jimboy Peñas, alias “Wilmar”, 25, construction worker, ug Elñino Rosal, 20, engraver kinsa namaligya usab og ilegal nga drugas sa drug den.

Lakip sa nasikop ang mga bisita sa drug den nga sila si Alfonso Pera, 37, walay trabaho; John Paul Sambrano, 26, laborer; ug Alladin Villegas, 44, walay trabaho. Nasakmit gikan sa mga suspetsado ang napulo ka paketeng shabu nga nitimbang ngadto sa 10 gramos nga nibalor ngadto sa P74,800, buy-bust money ug drug paraphernalia.

Kasong paglapas sa Article II sa Akta Republika 9165 kun “Comprehensive Dangerous Drugs Act of 2002” ang ipasaka batok sa mga suspetsado. —Rowena D. Capistrano/BDB (BANATNEWS)