Konsehal Gullas nagplano paghimo og Sugbo Merkado sa Talisay
CEBU, Philippines — Gilaraw ni konsehal Eduardo “Digul” Gullas III sa syudad sa Talisay nga maghimo og susama nga Sugbo Merkado alang sa mga nagsugod o gagmay nga negosyante sa Talisay.
Si Digul maoy chairman sa trade and industry sa konseho sa Talisay.
Matud pa niya nga ang laraw maghatag og kahigayonan sa mga gagmay nga negosyante sa Talisay nga makapakita sila sa ilang mga produkto. Makig alayon unya siya ngadto sa kadagkuan sa Chamber of Commerce Trade and Industry pinangulohan sa ilang presidenti nga si Cyril Velasco.
Nagkanayon si Digul nga siya ang magdala sa tingog sa mga gagmay ug dagkong negosyante sa Talisay diha sa hawanan sa konseho.
Sigon pa sa konsehal nga kung magmalambuon ang negusyo sa Talisay diha nasab molambo ang pagpanarbaho.
Iya sab unya nga himuon ang job fair alang sa mga nangita og trabaho ilabi na sa mga tinun-an sa Talisay City College (TCC).
Siya nipaambit sa iyang kasinatian sa pagtungha sa gawas sa nasud nga ang job fair usa ka kalihukan nga makabintaha sa mga Talisaynon. — /MEL (BANAT NEWS)
- Latest
